Näschtbeschmutzer
Quelle: Spotify
As goht üs guat! Miar hän üses Silber und Gold
Au 60 Johr nochem Holocaust und z Boot isch immer no voll.
49, 9 Prozent sägen das uf gliichi Wiis
und zeigen aimol meh: „Jo doch, miar hän halt scho a chliini Schwiiz!“
Und stolz chömmer sii. Miar hän üsi Freihait erkämpft,
zwor weniger dur Heldatum als mit opportunem Geld.
Nid vu Huus us Rebell, meh dr stuur Puur als Tell,
doch miar machen z Bescht drus, erschaffen Mytha als Ustuschmodell.
Stand- und wehrhaft, ob geg dr Gessler oder t Wehrmacht.
Reduit und Atombrot. Dr Schwiizer weiss, wia ma as Gwehr lad!
Miar chönn nai säga. Häns glernt. Widerstand vereinigt.
Doch sgit au Ziita, wos kai Nai git. Säg nia Nai wia Christoph Meili!
Miar sind suuber! Sogar Geld wird gwäscha und to, was ma suss chann:
40 Tönner uf t Schiina und Giftmüll ins Usland!
Ref.: Jo, Schwiiz! Du khöhrsch recht; as goht do um di!
Nai, Schwiiz! I mains ernscht, also los doch uf mi!
Jo, Schwiiz! Hoffa scho, dass du dia Ziila vertraisch!
Und jedesmol, wenn ma vu diar red, bin au i damit gmaint.
Ma schafft halt – verdiant jo au dafür. Zeigt stendig Iisatz.
Aber mit dr Arbetsmoral stiigt au t Chance ufen Bipass.
Drum gnüüsst ma t Badeferia (dopplet), schafft wiiter in beschter Gsundhait
Und isch an treua Bürger, wenn's aim vor dr erschta Renta umlait.
Das isch Schwiizer Präzision! Und miar sind waissgott nid unfrei,
nur teils waiss ma nid so recht und stimmt für das, wo grad dr Bund sait.
Harti Ziita brechen a! Dr Mittelstand würd absorbiat,
beschäftigt sich mit Stüüra zahla und dia bliiben plafoniart.
Profit schlöhn dia, wos hän und in da Röt no drüber bestimmen,
nid dia, wo z Gross bilden und iari Ziit mit Bügla verbringen.
S goht bergab. A Wirtschaftsbaisse machts für alli nötig z spara
Und t Schmach vum Grounding sitzt no tüüfer als dr Röschtigraba.
I gsehn Geld und Lüüt, wo sich wia siini Sklava verhalten,
stöhn Tag für Tag in Schlanga a vor Automata und Schalter.
Miar merken gar nümm, dass es üs nur no um t Arbet und da Gwünn goht
Und nur beschämmt an Boda luagen, wenn üs aina noch Münz frogt.
Jo, Schwiiz! Du luagsch guat uf mi, i dank dr dafür.
Und dass mi t Rega chämmt go hola, legg i t Hand no ins Füür.
Denn ma kriagt, solang ma zahlt. Bin froh um t Infrastruktur.
Abgas und Strahliga usgsetzt, doch gsund dank Vitaparcours!
Was, Solidargmeinschaft am End? Miar hän kai usgsetzti Kids!
Und falls soziali Missständ git, werdens ufdeckt im Blick.
Entzugs- und Heilastalt chönn nid vu üsna Wunda ablenka,
aber wo chämmt ma hii, grad all Problem bir Wurzla zbekämpfa?!
Für all an unteri Grenza; das würd kai Demokrat je totschwiiga.
Doch ohni Obergrenza chann no jeda Kaderlohn stiiga.
Und ma redt vu Integration und weiss, wia wichtig das isch,
aber verkneift sich trotzdem nid neui rassistischi Witz.
Usländerkritischi Bricht, egal welli Ziitig am liest.
Vorurteil sind starr, doch an dänna richtet ma sich.
Und Schnauzträger am Stammtisch, wüssen z erklära, was falsch isch,
wüssen, wer t Schuld trait, wenn mit füfzgi plötzlich ufem Arbetsamt bisch,
wüssen, dass jeda Asylant diin Job will
doch nur ummahangt wia dia Nochwuchs-Nazis dunna im Shopville.
Zeige deinen Freunden, dass dir Näschtbeschmutzer von Sektion Kuchikäschtli gefällt:
Kommentare