Nou Shrinketh Rose
Quelle: Spotify
Nou skrinketh rose ant lylie-flour,
That whilen ber that suete sauour
In somer, that suete tyde;
ne is no quene so stark ne stour,
Ne no leuedy so bryht in bour
That ded ne shal by glyde.
Who-se wol fleysch lust forgon
Ant heuene blis abyde,
On Iesu be is thoht anon,
That therled was ys side.
From Petresbourh in o morewenyng,
As y me wende o my pleyghyng,
On mi folie y thohte;
Menen y gon my mournyng
To hire that ber the heuene kyng,
Of merci hire bysohte:
'Ledy, preye thi sone for ous
That ous duere bohte,
Ant shild vs from the lothe hous
That to the fend is wrohte.'
My herte of dedes wes fordred,
Of synne that y haue my fleish fed
Ant folwed al my tyme,
That y not whider I shal be led
When Y lygge on dethes bed,
In ioie ore into pyne.
On o ledy myn hope is,
Moder ant virgyne;
We shulen into heuene blis
Thurh hire medicine.
Betere is hire medycyn
Then eny mede or eny wyn.
Hire erbes smulleth suete;
From Catenas into Dyuelyn
Nis ther non leche so fyn
Oure serewes to bete.
Mon that feleth eni sor,
Ant his folie wol lete,
Withoute gold other eny tresor
He may be sound and sete.
Of penaunce is his plastre al,
Ant euer seruen hire y shal,
Nou ant al my lyue;
Nou is fre that er wes thral
Al thourh that leuedy gent ant smal---
Heried be hyr ioies fiue!
Wher-so eny sek is,
Thider hye blyue;
Thurh hire beoth ybroht to blis
Bo mayden ant wyue.
Zeige deinen Freunden, dass dir Nou Shrinketh Rose von John Fleagle gefällt:
Kommentare